1. Antaeum terrae filium in Libya occidit. Hic cogebat hospites secum luctari et delassatos interficiebat ; hunc luctando necavit.

2. Busiridem in Aegypto, qui hospites immolare solitus erat ; hujus legem cum audiit, passus est se cum infula ad aram adduci, Busiris autem cum vellet deos imprecari, Hercules eum clava ac ministros sacrorum interfecit.

3. Cygnum Martis filium armis superatum occidit. Quo cum Mars venisset et armis propter filium contendere vellet cum eo, Jouis inter eos fulmen misit.

4. Cetum cui Hesione fuit apposita Trojae occidit ; Laomedonta patrem Hesiones quod eam non reddebat sagittis interfecit.

5. Aethonem aquilam quae Prometheo cor exedebat sagittis interfecit.

6. Lycum Neptuni filium quod Megaram Creontis filiam uxorem ejus et filios Therimachum et Ophiten occidere voluit interfecit.

7. Achelous fluvius in omnis figuras se immutabat. Hic cum Hercule propter Dejanirae conjugium cum pugnaret, in taurum se convertit, cui Hercules cornu detraxit, quod cornu Hesperidibus sive Nymphis donavit, quod deae pomis replerunt et cornu copiae appellarunt.

8. Neleum Hippocoontis filium cum decem filiis occidit, quoniam is eum purgare sive lustrare noluit tunc cum Megaram Creontis filiam uxorem suam et filios Therimachum et Ophiten interfecerat.

9. Eurytum quod Iolen filiam ejus in conjugium petiit et ille eum repudiavit occidit.

10. Centaurum Nessum quod Dejaniram violare voluit occidit.

11. Eurytionem centaurum quod Dejaniram Dexameni filiam speratam suam uxorem petiit occidit.