Neptunus et Apollo dicuntur Trojam muro cinxisse ; his rex Laomedon vovit quod regno suo pecoris eo anno natum esset immolaturum. Id votum avaritia fefellit. Alii dicunt parum eum promisisse. Ob eam rem Neptunus cetum misit qui Troiam vexaret ; ob quam causam rex ad Apollinem misit consultum. Apollo iratus ita respondit si Troianorum virgines ceto religatae fuissent finem pestilentiae futuram. Cum complures consumptae essent et Hesionae sors exisset et petris religata esset, Hercules et Telamon cum Colchos Argonautae irent eodem venerunt et cetum interfecerunt, Hesionenque patri pactis legibus reddunt, ut cum inde rediissent secum in patriam eam abducerent, et equos qui super aquas et aristas ambulabant. Quod et ipsum Laomedon fraudavit neque Hesionen reddere voluit ; itaque Hercules ad eos navibus comparatis ut Trojam expugnaret venit et Laomedontem necavit et Podarci filio ejus infanti regnum dedit, qui postea Priamus est appellatus ?. Hesionen recuperatam Telamoni concessit in conjugium, ex qua natus est Teucer.